Në Bashkinë e Tiranës po ndodh një tjetër riformatim: katër nënkryetarët Frida Pashako, Andi Seferi, Keti Luarasi dhe Jonida Halili kanë dhënë dorëheqjen, duke çelur rrugën për një valë të re emërimesh nga lart. Të komanduarit e rinj janë Ilir Mengra, Blendi Sula, Gentian Keri dhe Vasilika Vjero – emra të afërt me administratën socialiste, që sinjalizojnë një rigrupim nën mbikëqyrjen direkte të Partisë.
Takimi i zhvilluar në ambientet e Bashkisë nën drejtimin e Ogerta Manastirliut, tashmë drejtuese politike e PS për Tiranën, i ka dhënë ngjyrë politike kësaj lëvizjeje administrative. Manastirliu jo vetëm që prezantoi zyrtarisht ekipin e ri drejtues, por sipas burimeve nga brenda Bashkisë, ka marrë edhe rolin faktik të koordinimit të punëve në mungesë të një kryetari të zgjedhur.
Ndërkohë, kujtojmë se vetëm pak ditë më parë, Edi Rama u pa në një takim kokë më kokë pikërisht në ambientet e Bashkisë me Ogerta Manastirliun dhe Belinda Ballukun – dy emra kyç të PS, por edhe bashkëpunëtore të ngushta të tij që nga koha kur drejtonte vetë Bashkinë e Tiranës. Një sinjal i qartë se “ekipi i vjetër” po rikthehet në lojë.
Tashmë që zgjedhjet e parakohshme për kreun e Bashkisë nuk duken të largëta, pyetja që ngrihet natyrshëm është: A po përgatitet Ogerta Manastirliu për një garë më të madhe? A do të jetë ajo kandidatja e re e Ramës për Tiranën?
Në frymën e konsolidimit dhe mbikëqyrjes direkte nga PS, kjo mund të jetë prova e parë në terren për të ndërtuar profilin e saj si kandidate për Bashkinë e Tiranës.
