Adriatik Lapaj i ka dërguar një mesazh kreut të Partisë Demokratike, Sali Berisha, duke i propozuar bashkimin e protestave, por pa përdorimin e logove partiake.
I spostuar disa metra më tutje, pranë Kryesisë së Kuvendit, për t’i liruar hapësirën PD-së për protestën e kësaj të hëne, Lapaj deklaroi se ka ofruar një vizion për një protestë kombëtare, të udhëhequr vetëm nga flamuri shqiptar. Ai theksoi se do t’i bashkohej protestës së PD-së nëse kjo qasje do të pranohej.
“Unë kam ofruar vizionin për një protestë kombëtare me flamurin kombëtar, përtej logove të partive. Nëse PD do ta pranonte këtë, do të isha edhe unë së bashku me ta aty, për ta bërë masive, që askush të mos na ndalojë. Duhet ta kuptojmë se nuk duhet të jetë miting, por revoltë qytetare me qëndresë, revoltë e njerëzve që vijnë në shesh dhe nuk ikin më. Ai nuk ikën me mitingje, është provuar për 13 vite dhe nuk ka ikur. Prandaj duhet flamuri kombëtar që na udhëheq dhe një bashkim i madh i të gjithë shqiptarëve, të majtë e të djathtë, me parti apo pa parti”, tha Lapaj.
Nga deklaratat publike, duket se dy krerët politikë po afrohen drejt një bashkëpunimi. Sali Berisha, në prononcimet e tij për mediat gjatë javëve të fundit, ka vlerësuar disa herë protestat e organizuara nga Lapaj dhe ka bërë thirrje për bashkim të tyre. Nga ana tjetër, Lapaj nuk i ka kundërshtuar këto deklarata dhe, përmes qëndrimit të mbajtur mbrëmjen e sotme, duket se ka dhënë sinjalin e dakordësisë për një bashkëpunim të mundshëm.
