Kreu i “Shqipëria Bëhet”, Adriatik Lapaj, është shqetësuar për deklaratat e Berishës, i cili tha sot se është i gatshëm të ulet me Ramën për ndryshimet kushtetuese. Lapaj shprehet se ndryshimet e vitit 2008 i sollën shumë probleme Shqipërisë dhe, sipas tij, ky skenar pritet të përsëritet.
Megjithatë, ai i ka bërë të qarta qëndrimet e forcës politike që drejton, duke theksuar se është për sistem kombëtar me lista të hapura dhe për rikthimin e koalicioneve zgjedhore.
“Hera e fundit kur Sali Berisha u dakordësua me Edi Ramën për ndryshime kushtetuese ka qenë në vitin 2008. Ndryshimet kushtetuese të atij viti i shkaktuan Shqipërisë për kaq shumë vite kaq shumë probleme. Ky peshqesh rrezikon të na përsëritet. Sot, teksa morëm këtë lajm, këtu në fshatin Klos, ku po bëjmë takime me qytetarët, ne paraqesim qëndrimin tonë si lëvizje. Lëvizja “Shqipëria Bëhet” qëndron për një zonë zgjedhore proporcional kombëtar me lista të hapura. Së dyti, rikthimin e koalicioneve parazgjedhore. Këto të dyja do të realizonin demokratizimin e Shqipërisë dhe hapjen e garës”, tha ai.
Mbetet për t’u parë sa do të merren parasysh propozimet e Lapajt dhe si do t’i imponojë ai, pasi në komisionin e reformës zgjedhore mund të marrë pjesë vetëm si spektator, pa të drejtë vote. Gjithashtu, Rama dhe Berisha e kanë treguar se kur merren vesh për ndryshime të caktuara, nuk marrin mendim as nga këshilltarët e tyre.
