Kuvendi i Shqipërisë dhe Kryeministria kanë paraqitur argumente kundërshtuese në Gjykatën Kushtetuese ndaj vendimeve për pezullimin nga detyra dhe bllokimin e pasaportës së zv.kryeministres Belinda Balluku, duke i cilësuar ato në kundërshtim me Kushtetutën.
Në seancën gjyqësore, Drejtoresha Juridike e Kuvendit, Mimoza Arbi, deklaroi se sipas dispozitave kushtetuese deputetët gëzojnë imunitet dhe nuk mund të pengohen, arrestohen apo ndiqen penalisht pa miratimin e Kuvendit. Sipas saj, ndjekja penale dhe masat kufizuese mund të kryhen vetëm me pëlqimin e Kuvendit, ndaj vendimet për pezullimin nga detyra dhe bllokimin e pasaportës janë marrë në shkelje të parimeve kushtetuese.
Nga ana tjetër, përfaqësuesja e Kryeministrisë, Jona Jonuzaj, mbrojti në Kushtetuese ankimimin kundër vendimit të GJKKO-së për pezullimin e Ballukut si zv.kryeministre dhe ministre, vendim i marrë pas kërkesës së SPAK për arrestimin e saj. Sipas Kryeministrisë, me këtë vendim është cenuar parimi i ndarjes së pushteteve.
“GJKKO pretendon se kjo kërkesë nuk mund të ngrihet, duke argumentuar se nuk ka marrëdhënie juridike kushtetuese. Ne sqarojmë se nuk bëhet fjalë për një ankimim kushtetues individual dhe as për mbrojtjen e të pandehurit, por për marrëdhënien mes tre pushteteve. A ka të drejtë gjykata penale të pezullojë nga detyra një ministër? Ne vlerësojmë se jo,” u shpreh Jonuzaj.
Gjykata Kushtetuese pritet të shqyrtojë argumentet e palëve dhe të vendosë mbi vlefshmërinë kushtetuese të masave të marra ndaj Belinda Ballukut.
