Prokurorët e Posaçëm Dorina Bejko dhe Dritan Prenci janë paraqitur sot në Gjykatën Kushtetuese, ku po shqyrtohet kërkesa e Kryeministrit Edi Rama që kundërshton pezullimin nga detyra të zëvendëskryeministres Belinda Balluku.
Në seancë, Presidenti i Republikës përfaqësohet nga këshilltari Ilir Rusmali, shefi i kabinetit Hemion Braho dhe drejtorja e përgjithshme Eriola Shia. Kuvendi përfaqësohet nga drejtoresha juridike Mimoza Arbi, ndërsa qeveria nga Herald Jonuzaj.
Seanca në Gjykatën Kushtetuese mbahet sot dhe lidhet me masën e sigurisë “pezullimi i ushtrimit të detyrës publike”, të vendosur ndaj Belinda Ballukut me vendim të Gjykatës së Posaçme.
Seanca nisi në orën 10:00 dhe zhvillohet pas ankimimit të kryeministrit Edi Rama, i cili pretendon se me vendimin për pezullimin e Ballukut, gjykata ka shkelur kompetencat e tij kushtetuese si kryeministër.
