Vetëm pak orë pasi Gjykata Kushtetuese pezulloi dekretin e presidentit Bajram Bega për zgjedhjet e pjesshme për Tiranën, Florjan Binaj, kandidati i pavarur i mbështetur nga opozita ka reaguar. Në një reagim në rrjetet sociale, Binaj thekson se kurdo që të caktohet dita e votimit, ai do të marrë pjesë.
Postimi
Miqtë e mi,
Zgjedhjet e pritshme në Tiranë janë vetëm hapi i parë në rrugën e gjatë që po nisim.
Kurdo që të caktohet votimi, ne do të marrim pjesë me vizionin dhe vullnetin tonë për ndryshim.
Deri atëhere ju ftoj të punojmë çdo ditë për të ndezur në mendjet dhe zemrat e qytetarëve besimin tek politika e ndershme, tek politika e punës, besimin se pushteti buron nga qytetarët dhe duhet të punojë vetëm për qytetarët.
Partia më e rëndësishme, partia më e fuqishme në botë është partia e qytetarëve.
Flori!
Vendimi i Kushtetueses
Gjykata Kushtetuese ka vendosur sot të pezullojë dekretin e presidentit Bajram Begaj për shpalljen e zgjedhjeve të pjesshme vendore të 9 nëntorit, pas kërkesës së paraqitur nga ish-kryetari i Bashkisë së Tiranës, Erion Veliaj.
Mbledhja e gjyqtarëve është shoqëruar me debate të ashpra, pasi një pjesë e anëtarëve argumentonin se pezullimi i dekretit është një ndërhyrje e rrallë në kompetencat e presidentit, ndërsa të tjerë kërkonin që të garantohej “moskryerja e një procesi që mund të rezultojë i pavlefshëm”.
Vendimi është marrë me shumicë votash dhe do të qëndrojë në fuqi deri në dhënien e vendimit përfundimtar mbi kërkesën e Veliajt për vlerësimin e ligjshmërisë së shkarkimit të tij si kryetar bashkie.
