Gjykata Kushtetuese ka goditur sot vendimmarrjen e hallkave më të larta të drejtësisë në Shqipëri, duke deklaruar si antikushtetues izolimin në shtëpi të ish-kryeministrit Sali Berisha për periudhën korrik–dhjetor 2024. Përveç fitores ligjore, ky vendim mbart edhe një kosto financiare për buxhetin e shtetit.
Shteti "në borxh" me Berishën
Në pikën fundore të vendimit të saj, Gjykata Kushtetuese ka vendosur një sanksion financiar simbolik, por domethënës. Ministria e Financave është urdhëruar të paguajë vlerën prej 75,000 lekësh për shpenzimet e përfaqësimit ligjor të kërkuesit.
Edhe pse shifra nuk është e lartë në raport me rëndësinë e çështjes, ky detyrim faturon drejtpërdrejt qeverinë shqiptare për shkak të vendimeve të marra nga Gjykatat e Posaçme (GJKKO) dhe Gjykata e Lartë, të cilat u gjetën në shkelje të parimeve kushtetuese.
