Erion Veliaj vijon të ketë besnikët e tij në këshillin bashkiak të Tiranës. Kjo pasi në mbledhjen e sotme dy emra kanë bërë rezistencë për të firmosur për shkarkimin e tij.
Mësohet se njëri prej tyre ka qenë Aldo Mërkoçi, edhe pse në fund ka hedhur firmën së bashku me të gjithë kolegët e tij. Ai ka kërkuar që në deklaratë të shënohet se Veliaj i ka shërbyer qytetit dhe fjalë të tjera për punën e tij të mirë dhe kërkesa i është marrë parasysh.
Edhe Eridian Saljanji e ka konsideruar të vështirë zbatimin e këtij vendimi politik për shkak të bashkëpunimit prej shumë vitesh me Veliajn. Madje nëse do te ishte në kushte për të zgjedhur mes postit të tij dhe Veliajt, ky i fundit është shprehur se ishte i gatshëm të “sakrifikonte” veten.
Por pas diskutimeve është vendosur që të martën e ardhshme, në orën 16:00, të zhvillohet mbledhja e Këshillit Bashkiak të Tiranës, për të marrë vendimin.
Megjithëse shkarkimi i Veliajt duket i vishtirë për shkak se mbetet e pambështetur juridikisht, mbetet për t’u vlerësuar guximi i dy këshilltarëve që të dalin kundër “urdhrit” të Edi Ramës.
