Kryetari i Gjykatës së Lartë, Sokol Sadushi, po përfaqëson Shqipërinë në Konferencën e Kryetarëve të Gjykatave të Larta të Bashkimit Evropian, që po zhvillohet në Hagë nga 13 deri më 15 nëntor 2025, ku vendi ynë merr pjesë me status vëzhguesi.
Në sesionin hapës, Kryetarja e Gjykatës së Lartë të Holandës, Dineke de Groot, dhe Kryetari i Parë i Gjykatës së Kasacionit të Francës, Christophe Soulard, shprehën ngushëllimet për vrasjen e gjyqtarit Astrit Kalaja dhe mbështetën deklarimin e Sadushit se “drejtësia nuk do të përkulet përballë dhunës”.
Sadushi falënderoi drejtuesit e gjykatave evropiane për solidaritetin, duke theksuar se sulmi në sallën e gjyqit ishte një goditje ndaj shtetit të së drejtës:
“Mbështetja e gjyqësorit evropian është një kujtesë e fuqishme se integriteti i gjyqësorit është një vlerë e përbashkët. Qëndresa jonë është përgjigjja më e denjë ndaj aktit të dhunës.”
Në Sesionin II, i fokusuar te roli i mediave sociale dhe sfidat e pavarësisë gjyqësore, Sadushi theksoi rreziqet që sjell epoka dixhitale:
"dezinformimi, gjuha e urrejtjes dhe presionet ndaj vendimmarrjes. Ai nënvizoi nevojën që drejtësia të ndërtojë një “zë dixhital të besueshëm, të qetë dhe kurajoz” për mbrojtjen e integritetit institucional dhe rritjen e besimit publik.
Konferenca vijon punimet deri më 15 nëntor.
