Ervin Salianji sqaroi në emisionin “Opinion” se nuk ka ndërmend të largohet nga Partia Demokratike dhe as të krijojë një parti të re. Ai theksoi se komunikimi me Sali Berishën është i lirë dhe i hapur, ndërsa takimet me demokratët janë pjesë e domosdoshme e një partie që kërkon ndryshim.
“Nuk më pengon asgjë të komunikoj me Berishën. Kam këtë mendim, mund të ketë mendim tjetër. T’i dëgjojmë njerëzit, ça mendojnë. Ku ndalohet në statut të takosh demokratët? PD duhet të sjellë ndryshimin. Nga kjo lëvizje PD ka dalë nga zona e rehatisë. Dhe shyqyr që ka një ngjarje që ta përmirësojmë. Ne do jemi këtu, do vijmë prapë,” u shpreh ai.
I pyetur për zgjedhjet e brendshme të prillit, Salianji mohoi se synon një post drejtues dhe tha se të gjitha problemet që ka evidentuar ia ka komunikuar edhe Berishës, si në mbledhjet e kryesisë, ashtu edhe publikisht.
“Berisha më ka thënë se do ndryshojmë dhe do e gjejmë zgjidhjen. Në çdo mbledhje të kryesisë i kam thënë këto, i kam thënë edhe në publik”, tha ai.
Salianji shtoi se pakënaqësia e tij nuk lidhet me individë të caktuar, por me mënyrën se si PD po funksionon dhe po merr vendime.
“Unë kam pakënaqësi me gjendjen, nuk kam pakënaqësi me emrat. Pakënaqësi ndaj PD është që nuk po dëgjon në mënyrën e duhur zërin e anëtarësisë. Nuk po i përshtatet nevojave të shoqërisë për ndryshim. Sepse anëtarësia të voton disa, lidershipi zgjedh disa të tjerë. Sepse anëtarësia e PD kërkon revoltë, ne bëjmë foltore. Sepse anëtarësia e PD kërkon analizë, se duam ta bindim se zgjedhjet janë vjedhur. Nuk ka nevojë, të gjithë janë të bindur se zgjedhjet janë vjedhur. Unë e kam pakënaqësinë me idetë dhe me vendimmarrjen, nuk kam pakënaqësi me emrat,” theksoi ai.
