Një front i ri opozitar është krijuar në Vlorë kundër partisë në pushtet. Përfaqësues të disa forcave opozitare në qytetin bregdetar u mblodhën këtë të mërkurë, duke themeluar të ashtuquajturin “Front Opozitar”.
Kjo nismë, që ka nisur nga Vlora, synon të shtrihet në qytete të tjera të vendit dhe më pas të konsolidohet edhe në nivel qendror. Qëllimi kryesor i saj është forcimi i opozitës dhe rritja e presionit politik ndaj qeverisë.
Pjesë e kësaj lëvizjeje është edhe ish-deputeti i Partisë Socialiste, Arben Malaj, i cili së fundmi është shfaqur si një nga kritikët më të ashpër të qeverisë. Ai gjithashtu më herlët ka njoftuar se do të kandidojë si i pavarur për Bashkinë e Vlorës.
Pjesë e kësaj iniciative janë edhe përfaqësues lokalë të Partisë Demokratike, mes tyre këshilltari bashkiak Atird Hoxha. Kjo tregon se demokratët janë të pakënaqur me mënyrën se si partia e tyre bën opozitë, duke zgjedhur të kontribuojnë në këtë front të ri opozitar.
