Pas më shumë se dy orësh pyetje e përgjigje në Kuvend, deputetët e opozitës u shfaqën të zhgënjyer nga raportimi i kreut të SPAK, Altin Dumani, dhe e shfrytëzuan kohën në dispozicion për ta akuzuar ashpër. Sipas demokratëve, drejtësia e posaçme ka dalë jashtë funksionit të saj fillestar dhe është kthyer në instrument politik të mazhorancës.
Nga foltorja e Kuvendit, Sali Berisha e quajti Dumanin “mashtrues ordiner” që sipas tij po përpiqet të mbrojë Edi Ramën dhe të mbulojë aferat më të mëdha korruptive të dekadës. Berisha përmendi rastin CEZ dhe aferën e inceneratorëve, duke deklaruar se qytetarët shqiptarë kanë humbur qindra miliona euro për shkak të pazareve të qeverisë.
Në të njëjtën linjë, Luçiano Boçi kujtoi se gjatë fushatës elektorale kishte kërkuar takim me kreun e SPAK për të dorëzuar një denoncim lidhur me zgjedhjet në Shkodër, por Dumani e kishte refuzuar. “Nëse ne themi se SPAK është kthyer në instrument të pushtetit, këta e dinë shumë mirë dhe e besojnë,” – tha Boçi.
Edhe Belind Këlliçi e akuzoi drejtësinë e posaçme për veprim selektiv, duke e cilësuar Task-Forcën e SPAK “alibi të masakrës elektorale të 11 majit”. Sipas tij, SPAK ka shërbyer si “pushkë goditëse ndaj kundërshtarëve politikë të Edi Ramës”.
Jorida Tabaku iu referua hetimeve të saj si kryetare e Komisionit Hetimor për inceneratorët, duke kujtuar se ka dorëzuar 12 kallëzime penale, përfshirë edhe ndaj kryeministrit, por asnjë prej tyre nuk është çuar përpara drejtësisë.
Nga ana tjetër, Klevis Balliu dhe Elda Hoti e akuzuan Dumanin për mungesë guximi për të hetuar “zotat e mëdhenj të pushtetit”, ndërsa Tedi Blushi tha se kreu i SPAK po vepron si “patronazhist në krye të një strukture që synon të godasë pluralizmin politik”.
Seanca e sotme dëshmoi tensionin e rritur mes opozitës dhe drejtësisë së posaçme, në një moment kur hetimet e SPAK po prekin gjithnjë e më shumë zyrtarë të lartë të qeverisë. Mesa duket deputetët opozitarë presin që Dumani të mundë Ramën dhe të mundesojë kështu ardhjen në pushtet të opozitës.
