Në mbledhjen e djeshme, Komisioneri Shtetëror i Zgjedhjeve, Ilirjan Celibashi, miratoi vendimin për kompensimin financiar të subjekteve politike, PS, PD, Lëvizjes Bashkë, Lëvizjes Shqipëria Bëhet, Partisë Mundësia, PSD dhe Partisë Koalicioni Euroatlantik. Këto parti përfituan kompensim pasi arritën të siguronin mbi 1% të votave të vlefshme në zgjedhjet e 11 majit 2025.
Sipas vendimit të Komisionit Qendror të Zgjedhjeve, fondi total i dedikuar nga buxheti i shtetit për financimin e fushatës zgjedhore ishte 150 milionë lekë. Bazuar në nenin 88, pika 2 e Kodit Zgjedhor, kompensimi u përcaktua në vlerën prej 94 lekë për çdo votë të vlefshme të marrë nga partitë që kaluan pragun e 1%.
Në këtë kuadër, pjesën më të madhe e mori Partia Socialiste, e cila është fituese me 53.29% të votave dhe merr 79,935,000 lekë. Ndërsa Partia Demokratike me 32.91% të votave mori 49,365,000 lekë.
Nga “torta” përfituan edhe partitë e vogla si Lëvizja Bashkë e Arlind Qorit me 1.53% vota, 2,307,418 lekë.
Koalicioni Lëvizja Shqipëria Bëhet e Adriatik Lapajt dhe Endri Shabanit që 4% vota 3,884,362 lekë. Mbetet për t’u parë se si do të bëjnë ndarjen e parave dy kryetarët që u sherrosën për disa javë se kush do ta merrte të vetmin mandat deputeti që fituan në 11 maj. Të shpresojmë që nuk do të përsëriten të njëjtat përplasje edhe në këtë rast.
Një tjetër parti që përfiton para nga KQZ, është edhe Koalicioni Euroatlantik i Lulzim Bashës. Ndonëse nuk arriti që të siguronte një mandatit deputeti, kjo forcë politike arriti që të marr 1.30% të votave në të gjithë vendin, dhe kështu i takojnë 1,963,190 lekë nga buxheti për partitë. Menjëherë pas vendimit të KQZ, ky i fundit reagoi për herë të parë duke ndërruar fotot e profilit dhe kopertinës në faqen e tij në facebook. Duhet theksuar se që pas përfundimit të zgjedhjeve ai nuk ka dalë publikisht apo të prononcohet për mediat, madje mbylli edhe selinë e partisë që kishte në rrugën "Donika Kastrioti".
Gjithashtu në listën e përfituesve janë edhe partitë e Agron Shehajt dhe Tom Doshit të cilët respektivisht marrin: Partia Mundësia me 3.05% vota 4,601,488 lekë dhe PSD me 3.10% votave 4,650,000 lekë. Shifra simbolike në krahasim me pasuritë që kanë deklaruar kryetarët e tyre në ILDKPI dhe që u shërbejnë për të mbuluar edhe fushatat elektorale.
