Kryebashkiaku i Tiranës, Erion Veliaj, i cili ndodhet në arrest prej 10 shkurtit me vendim të GJKKO pas hetimeve të SPAK, nuk do të marrë pjesë në mbledhjen e sotme të Këshillit Bashkiak ku pritet të vendoset për shkarkimin e tij.
Komisioni i Çështjeve Ligjore dhe Drejtësisë Sociale rrëzoi kërkesën e Veliajt për të qenë i pranishëm, me votat e shumicës socialiste dhe disa këshilltarëve të tjerë, ndërsa opozita argumentoi se kryebashkiakut duhet t’i njihet e drejta kushtetuese për t’u dëgjuar para vendimit përfundimtar. Burime bëjnë me dije se edhe SPAK nuk ka dhënë autorizim për pjesëmarrjen e tij.
Mbledhja vendimtare e Këshillit Bashkiak është thirrur në orën 16:00. Propozimi për shkarkimin e Veliajt mbështetet në nenin 62 të ligjit “Për Vetëqeverisjen Vendore”, që parashikon largimin nga detyra të një kryebashkiaku kur mungon për më shumë se tre muaj pa ndërprerje.
Sipas këshilltarëve, Tirana prej muajsh ndodhet pa drejtues të zgjedhur, çka e bën të domosdoshme marrjen e një vendimi. Edhe opozita mbështet shkarkimin, por vetëm duke respektuar procedurën ligjore dhe të drejtën e Veliajt për të folur.
