Vendimmarrja e Kolegjit Zgjedhor për ankimimin e Andia Ullirit mund të shërbejë si model për të klasifikuar mjerimin e mendimit juridik, në të cilin është katandisur drejtësia shqiptare.
Për ta përmbledhur, kujtojmë se Komisioneri Shtetëror i Zgjedhjeve, me shpalljen e rezultatit për qarkun e Durrësit, arsyetoi që mandati i fundit për koalicionin e Berishës i takonte ish-gjyqtarit Arjan Ndoja.
Andia Ulliri ankimoi vendimmarrjen e Komisionerit Shtetëror të Zgjedhjeve dhe kërkoi nga KAS që të shqyrtonte kuotën gjinore për shpërndarjen e mandateve.
KAS, me një vendimmarrje të gjatë dhe të qartë, argumentoi me unanimitet se sipas leximit të dispozitave të Kushtetutës dhe Kodit Zgjedhor, kuota gjinore llogaritej më vete për listën e mbyllur dhe atë të hapur.
Andia Ulliri, në të drejtën e vet, depozitoi ankimimin edhe ndaj kësaj vendimmarrjeje në Kolegjin Zgjedhor.
Absurdi i vendimit të Kolegjit dëshmon nivelin e mjerueshëm ku mbase është katandisur e gjithë trupa e magjistratëve të drejtësisë së re.
Kolegji Zgjedhor vendosi moslegjitimimin e Andia Ullirit si ankimuese!
Andia Ulliri, sipas Kolegjit Zgjedhor, nuk kishte të drejtë të ankohej për mandatin e vet.
Por askund nuk thuhet që KAS është shkalla e fundit e shqyrtimit të ankimimit për rastin.
Kolegji i absurditeteve vendosi që Andia Ulliri nuk kishte interes të ligjshëm për t’u ankuar për mandatin e vet. Fundja, ç’i duhej Andias nëse e merrte apo nuk e merrte mandatin?
Dhe ky nuk është humor. Është vendimi i Kolegjit Zgjedhor.
Një Kolegj Zgjedhor ku parimet e së drejtës nuk njihen deri në këtë nivel, turpëron gjithë trupën e magjistratëve.
Kur lexon CV-të pastaj, dhe mes tyre sheh edhe ndonjërin që KPK e ka kthyer në shkollë që të mësojë — sepse sipas KPK paska qenë juridikisht i paditur — kupton varfërinë juridike ku notojnë fatet e shqiptarëve.
Në këtë pikë, të duket luks të pretendosh që ky nivel mjerimi profesional të mund të kuptojë Kodin Zgjedhor dhe Kushtetutën.
Këta nuk i legjitimon dot asnjë logjikë formale juridike.
Siç nuk mund t’u bëjë derman shkolla juridike në moshën 55 vjeç, kur nuk kanë kuptuar dot as leksionet bazë kur kanë qenë 20.
