Aktivistja shqiptaro-amerikane Evi Kokalari, një nga mbështetëset më të zëshme të Sali Berishës gjatë lëvizjes së “Foltores” dhe betejës për selinë e Partisë Demokratike, është shprehur e zhgënjyer pasi thotë se nuk ka arritur ende të regjistrojë kandidaturën e saj për procesin e zgjedhjes së kryetarit të ri të PD-së.
Në një status në Facebook, Kokalari shkruan se avokati i saj ka shkuar paraditen e sotme në selinë e PD-së për të dorëzuar dokumentet, por nuk është lejuar të hyjë brenda.
“Në orën 9:30 AM, avokati im në Tiranë ka shkuar në selinë e PD-së për të dorëzuar dosjen e aplikimit dhe roja nuk e ka lënë të hyjë brenda, por i ka komunikuar, pasi ka folur me dikë brenda, që: ‘nuk pranojmë zarfe’”, shkruan ajo.
Sipas Kokalarit, avokati i saj ka sqaruar se bëhej fjalë për dosjen e aplikimit të saj për kandidim, ndërsa ajo shton se dokumentet do të dërgohen me postë.
“Do ta nisim me DHL dhe do t’ua dërgojmë atyre që duhet, via text dhe email përpara afatit të skadencës”, shkruan Kokalari, duke e mbyllur reagimin me një koment ironik: “Clowns!!!”.
