Delegacioni i Bashkimit Evropian në Tiranë ka reaguar në lidhje me projekt-amendamentet e reja në Kodin Penal, duke shprehur shqetësime serioze për përputhshmërinë e tyre me standardet evropiane të të drejtave të njeriut.
Delegacioni i BE bën të ditur se nuk ka qenë pjesë e grupit të ekspertëve që hartuan këto ndryshime dhe thekson se aktualisht po i shqyrton propozimet. Sipas tyre, disa nga dispozitat mund të cenojnë drejtat themelore të qytetarëve, përfshirë lirinë e shprehjes dhe të medias.
“Këto dispozita nuk janë në përputhje me standardet e BE-së. Jemi të bindur se, në kuadër të procesit të konsultimit dhe angazhimeve për anëtarësim, këto shqetësime do të adresohen”, thuhet në deklaratë.
BE thekson nevojën për një proces gjithëpërfshirës dhe transparent konsultimi me institucionet kryesore të drejtësisë, shoqërinë civile dhe aktorët e shtetit të së drejtës, me qëllim sigurimin e cilësisë më të lartë të legjislacionit.
Në kuadër të negociatave të anëtarësimit, Shqipëria pritet të përafrojë legjislacionin penal me atë të BE-së. Delegacioni nënvizon se përparësi duhet t’i jepet ndryshimeve që lidhen me dekriminalizimin e shpifjes, luftën kundër trafikut të drogës, trafikimit të qenieve njerëzore, abuzimit me të miturit, armëve të zjarrit dhe pastrimit të parave.
BE shpreh gatishmërinë për të ofruar ndihmë teknike gjatë këtij procesi reformimi.
