Sekretari i Përgjithshëm i Partisë Socialiste, Blendi Klosi, e ka vënë në pikëpyetje kandidimin e Ogerta Manastirliut për bashkinë e Tiranës. Në një intervistë për “Shqipëria Live”, Klosi tha se nuk dihet ende nëse Manastirliu do të jetë kandidate, pasi ka dhe një vit e gjysmë kohë nga zgjedhjet lokale.
“Ogerta është drejtuese politike e qarkut të Tiranës, bashkisë së Tiranës. Ka detyrë të drejtojë PS të Tiranës. A do të jetë sërish kandidate? Do të jetë proces që do kërkojë kohën e vet, një vit e gjysmë kohë”, tha ai.
Klosi gjithashtu u distancua nga vendimi për shkarkimin e Veliajt, ndonëse këtë e kishte kërkuar edhe publikisht kryeministri Edi Rama. Ish-ministri tha se shkarkimi i Veliajt nga këshilli bashkiak ishte vendim politik.
“Veliaj është kryetari i bashkisë së Tiranës. Falë këtij transformimi ne marrim vota, historia me individin është tjetër gjë. A ka probleme largimi i Veliajt nga detyra? Patjetër që ka. Unë nuk isha pjesë e votimit. Shkarkimi i tij ishte vendim politik”, u shpreh ai.
