Qeveria dhe opozita nuk kanë asnjë dallim edhe në fantazitë që shpërfaqin kur ia hedhin fajin njëra tjetrës për veprimet e tyre në protestë.
Pasi e para detyroi mediat pranë saj të thonë se gazi lotsjellës në xhaminë e Namazgjasë e kanë hedhur protestuesit, del nga PD deputeti Klevis Balliu për të treguar një rast po aq qesharak me skenare të inskenuara.
Nga ambientet e paraburgimit, ku ka takuar qytetarët e arrestuar gjatë protestës së fundit, Balliu ka rëfyer një episod alla filmash Netflix. Sipas tij, dy të mitur që ndodhen aktualisht në paraburgim janë përdorur në një skenar të inskenuar, ku një person u ka futur kapsolla në çantat e shkollës dhe u ka kërkuar që, në rast arrestimi, të deklaronin se ishin paguar nga opozita.
Deputeti i PD thotë se vetëm pak minuta pas këtij momenti, të miturit janë arrestuar dhe po mbahen në paraburgim në mënyrë të padrejtë.
E kuptojmë përpjekjen e Klevis Balliut për ta dramatizuar sjelljen e qeverisë ndaj protestuesve, por kur kjo kalon edhe në butafori të këtij niveli, nuk bën gjë tjetër vetëm sa tregon një histori më qesharake se pretendimi që “protestuesit hodhën gazin në xhami”.
