Ish-deputeti i Partisë Demokratike, Ervin Salianji, ka deklaruar se brenda grupit të tij nuk është shtruar aspak për diskutim çështja e largimit të Sali Berishës nga drejtimi i PD-së. Në një intervitë për News 24, ai theksoi se fokusi i vetëm i takimeve të tij me demokratët është ripërtëritja e partisë dhe rikthimi i meritokracisë. Sipas tij, PD në gjendjen aktuale nuk ka mundësi të fitojë, dhe qëllimi është që partia të jetë fituese.
“Ky diskutim nuk është shtruar. Është një diskutim që mund të ishte që pas zgjedhjeve të 11 majit, nuk e ka kërkuar asnjë prej nesh këtë deri më sot. Qëllimi është që PD të jetë fituese, për mua. Kështu siç jemi PD nuk fiton dot. Jemi njëherë te qëllimi. A duhet të jetë fituese? Po. PD duhet të të jetë fituese duke i thyer disa kolona që e kanë dëmtuar partinë“, tha ai.
Salianji e sheh opozitën shumë inferiore dhe i duhej një analizë jo vetëm e thellë, por edhe me masa konkrete për riorganizim dhe ndarje përgjegjësish për atë humbje më 11 maj.
“Nuk do bëjmë vetëm analizë, por do mbahen edhe përgjegjësi. A ka përgjegjësi apo jo? Duhet ta bëjmë analizën. Sepse nuk mund ta marrim Messin dhe ta çojmë në një skuadër të dobët, sepse nuk fiton dot”, tha ish-deputeti mes të tjerash.
Ai gjithashtu tha se pas analizës duhet të ndahen edhe funksionet, jo të mbaheshin primare në parti dhe më pas fituesit të mos kandidonin.
“A duhen ndarë funksionet, a duhet t’i mbajmë Primaret apo jo dhe nëse po a duhet t’i vendosim ata deputetë? A duhet ripërtërirë partia apo jo, a duhet të japim hapësira për këta njerëz në parti, këto duhen diskutuar. Interesi personal është që PD të jetë fituese, njerëzit që kanë sakrifikuar për PD-në dhe kanë dalë më të votuarit të jenë në vendet që kërkojnë dhe meritojnë, interesi është që të rrëzohet Rama, edhe për shkak të dënimit. Duhet te jemi në revoltë”, u shpreh Salianji.
