Mbledhja e Këshillit për Rregulloren, Mandatet dhe Imunitetin në Kuvendin e Shqipërisë, ku po shqyrtohet kërkesa për heqjen ose jo të imunitetit të deputetes Belinda Balluku, është shtyrë pa u caktuar një datë për mbledhjen e radhës.
Gjatë diskutimeve, deputetët ranë dakord që të marrin në dorëzim materialet e paraqitura nga Prokuroria e Posaçme, të cilat ndodhen në një USB. Fillimisht pati debate lidhur me faktin nëse dokumentacioni duhej apo jo të dilte nga ambientet e Këshillit të Mandateve, por në fund palët u dakordësuan që deputetët ta marrin USB-në me vete për shqyrtim.
Burime bëjnë me dije se prokurorët kanë sqaruar se materiali mund të aksesohet vetëm nga anëtarët e Këshillit të Mandateve, duke respektuar procedurat ligjore, si dhe se është dhënë dakordësia që edhe avokati i Ballukut të njihet me provat.
Dosja e përgatitur nga SPAK për të mbështetur kërkesën për heqjen e imunitetit përmban rreth 10 mijë faqe. Për këtë arsye, mbrojtja ka kërkuar më shumë kohë për t’u njohur me materialin, ndërsa prokuroria ka qëndruar në afatin maksimal prej 3 deri në 5 ditësh.
Debati ka përfshirë edhe afatin e mbledhjes së radhës. Një pjesë e mazhorancës është shprehur dakord për shtyrjen e seancës deri më 19 janar, ndërsa opozita ka kundërshtuar, duke kërkuar që mbledhja të zhvillohet më herët, konkretisht të hënën.
Mbledhja u shoqërua me debate të forta dhe, pavarësisht vendimit për shtyrje, nuk u arrit dakordësi mes palëve për një datë konkrete. Ndërkohë, anëtarët e Këshillit të Mandateve kanë marrë USB-në me rreth 10 mijë faqe prova të SPAK ndaj Belinda Ballukut.
