Këshilli i Mandateve dhe Imunitetit do të mblidhet sot për të shqyrtuar kërkesën e Prokurorisë së Posaçme për heqjen e mandatit të deputetes dhe zëvendëskryeministres Belinda Balluku, çka do t’i hapte rrugë arrestimit të saj.
Mbledhja është parashikuar të nisë në orën 10:30. Balluku është marrë e pandehur për shkelje të dyshuara në procedurat e prokurimit, që lidhen me tenderin e Tunelit të Llogarasë si dhe me 7 lotet e projektit të Unazës së Madhe.
Këshilli i Mandateve dhe Rregullores drejtohet nga kryetari Niko Peleshi. Anëtarët nga Partia Socialiste janë Taulant Balla, Ulsi Manja, Bledi Çuçi, Bledi Çomo, ndërsa Antoneta Dhima është anëtare zëvendësuese dhe Arkend Balla anëtar zëvendësues.
Nga radhët e Partisë Demokratike, anëtarë të Këshillit janë Gazment Bardhi, Oerd Bylykbashi, Elda Hoti, Gent Strazimiri dhe Saimir Korreshi, ndërsa Ivi Kaso dhe Gerta Bardeli janë anëtarë zëvendësues.
Pas shqyrtimit të kërkesës së SPAK, Këshilli pritet t’i paraqesë një raport Kuvendit, i cili do të marrë vendimin përfundimtar lidhur me heqjen ose jo të mandatit të Belinda Ballukut.
