Këshilli Bashkiak i Tiranës ka votuar unanimisht për shkarkimin e kryebashkiakut, Erion Veliaj. Mbledhja u shoqërua me diskutime vetëm nga përfaqësuesit e opozitës të cilët e quajtën këtë vendim të vonuar dhe se Veliaj duhej të shkarkohej dhe për shumë arsye të tjera.
Ndërsa socialistët i qëndruan deklaratave të kryeministrit duke theksuar se tashmë ka ardhur momenti që kryeqyteti të ketë një drejtues të ri, i cili do të vazhdojë projektet në shërbim të qytetarëve.
Në fund të tre kërkesat e grupeve që kishin të njëjtin qëllim u bashkuan në një dhe u votuan unanimisht nga të gjitha palët. Propozimi tashmë i shkon Këshillit të Ministrave që do të japë fjalën e fundit.
Kushtetuta thotë se në rast shkarkimit të të zgjedhurve vendor, i shkarkuari, në këtë rast Erion Veliaj, ka të drejtë ta ankimojë procedurën në Gjykatën Kushtetuese, dhe në rast se bën diçka të tillë, atëherë edhe procedura e shkarkimit do të duhet të kalojë filtrin kushtetues, i cili mesatarisht zgjat tre muaj,
Kësisoj, edhe planet e socialistëve për zgjedhje të shpejta në Tiranë, mund të shtyhen për muajt e parë të 2026.
