Këshilli Bashkiak i Tiranës i është përgjigjur kërkesës së kryebashkiakut të arrestuar, Erion Veliaj, i cili kishte kërkuar të marrë pjesë në mbledhjen e së martës, ku do të diskutohet dhe votohet shkarkimi i tij.
Në përgjigjen e dërguar ditën e sotme Veliajt, këshilli thekson se në rast pamundësie për të qenë fizikisht i pranishëm, ai mund t’i dërgojë me shkrim komentet dhe observacionet e tij, të cilat do të administrohen dhe do të bëhen me dije gjatë mbledhjes.
Të premten, Veliaj i kërkoi këshillit të lejohej të merrte pjesë personalisht, duke theksuar se mungesa e tij në punë nuk lidhet me vullnetin e tij, por me një “masë sigurie” disproporcionale dhënë nga gjykata.
Në kërkesën e tij, ai u shpreh se vendimi gjyqësor ka ndërprerë padrejtësisht një mandat kushtetues, duke shtuar se kjo krizë e shkaktuar nga gjykata nuk mund të zgjidhet me një tjetër shkelje të Kushtetutës.
Mbledhja e Këshillit Bashkiak të Tiranës për shkarkimin e Veliajt do të zhvillohet të martën, në orën 16:00.
