Këshilli Bashkiak i Tiranës i është drejtuar zyrtarisht Prokurorisë së Posaçme kundër Korrupsionit dhe Krimit të Organizuar (SPAK) dhe Drejtorisë së Përgjithshme të Burgjeve, duke kërkuar lejimin e pjesëmarrjes fizike të kryebashkiakut Erion Veliaj në mbledhjet për konsultimin dhe detajimin e projektbuxhetit të Bashkisë së Tiranës për vitin 2026.
Në kërkesën zyrtare, Këshilli Bashkiak thekson se pjesëmarrja e kryetarit të bashkisë në këtë proces përbën një detyrim ligjor, të përcaktuar nga legjislacioni për vetëqeverisjen vendore, si dhe një element thelbësor për garantimin e bashkëpunimit institucional në çështje me interes publik.
Sipas dokumentit, kërkesa bazohet në Ligjin nr. 139/2015 “Për Vetëqeverisjen Vendore”, i ndryshuar, ku neni 58, pika 4, i njeh kryetarit të bashkisë të drejtën për të marrë pjesë në mbledhjet e Këshillit Bashkiak dhe për të raportuar, ndërsa neni 60 përcakton bashkëpunimin e detyrueshëm ndërmjet kryetarit të bashkisë dhe këshillit për çështje të interesit publik.
Po ashtu, Këshilli Bashkiak i referohet edhe Ligjit nr. 68/2017 “Për Financat e Qeverisjes Vendore”, ku neni 41 parashikon se kryetari i njësisë së vetëqeverisjes vendore përgatit projektbuxhetin vjetor dhe ia paraqet atë për miratim Këshillit Bashkiak.
Në këtë kuadër, Këshilli kërkon që, nëse ndaj kryebashkiakut Erion Veliaj janë duke u zbatuar masa kufizuese, të vlerësohet mundësia e lejimit të përkohshëm të pjesëmarrjes së tij fizike në konsultimet për projektbuxhetin, në një nga datat 16–18 dhjetor 2025.
Këshilli Bashkiak shprehet i gatshëm të bashkëpunojë plotësisht me SPAK-un dhe Drejtorinë e Burgjeve për çdo kërkesë sigurie, protokolli apo logjistike, me qëllim garantimin e një procesi ligjor, transparent dhe funksional, duke kërkuar një përgjigje zyrtare mbi vendimmarrjen e institucioneve përkatëse.
