Komisioni i Ankimimeve dhe Sanksioneve i ka dhënë fund përplasjes për mandatin e vetëm të koalicionit “Nisma Shqipëria Bëhet”. Në mbledhjen e sotme, KAS vendosi se dorëheqjet e kandidatëve të këtij koalicioni, të dhëna ditën e zgjedhjeve, janë të pavlefshme. Këto veprime u cilësuan si juridikisht “akte nule”, duke konfirmuar paralajmërimet e mëparshme të VNA dhe duke i trajtuar si një strategji politike e dështuar.
Në përfundim, KAS la në fuqi pjesën tjetër të vendimit të Komisionit Qendror të Zgjedhjeve. Megjithatë, “lufta për mandatin” përfundoi sërish në favor të fisit Lapaj. Deputete do të jetë Ana Dajko, 60 vjeçe, me profesion shitëse, e cila është nëna e një aktivisti të “Shqipëria Bëhet” dhe ishte futur në listë thjesht për të mundësuar djegien e saj. Ajo zëvendëson kushërirën e saj, Kleana Xhuveli.
Por pavarësisht fitores së kësaj beteje, mundësitë që Adriatik Lapaj të bëhet vetë deputet janë minimale. Sipas Kodit Zgjedhor, nëse një deputete jep dorëheqjen, mandati i kalon kandidatit pasues të gjinisë femërore, derisa të shterohen emrat e grave në listë. Vetëm atëherë radha i kalon kandidatëve meshkuj.
Megjithatë, në fund të kësaj beteje të turpshme, secili do bëj bilancin e tij. Për Lapajn, ndoshta më e rëndësishme është që mandate nuk shkoi tek partia tjetër e koalicionit, ajo e Endri Shabanit. Nga ana tjetër, Shabani, ndonëse nuk arriti të marrë mandatin, arriti të bëjë të njohur dajën e tij, duke treguar se dajat mund të përdoren edhe për qëllime politike.
Kjo përplasje mes dy “aleatëve” tregoi se jo vetëm që nuk janë të ndryshëm nga klasa e vjetër politike, por ndoshta edhe më keq: për karrierën e tyre politike, janë të gatshëm të përdorin njerëzit më të afërt.
