Kaosi ka mbizotëruar në seancën e fundit plenare të këtij sesioni parlamentar në Kuvendin e Shqipërisë. Që para nisjes së punimeve, deputetët e opozitës hynë në sallë dhe “zaptuan” karriget e kabinetit qeverisës, duke shkaktuar përplasje me Gardën.
Gardistët u përpoqën t’i largonin deputetët opozitarë, por situata agravoi në përplasje fizike.
Opozita synonte të ndalonte betimin e Endri Shabanit si Avokat i Popullit, i cili u zgjodh vetëm me votat e PS dhe me firmat e PD. Megjithatë, Shabani u betua mes kaosit dhe më pas u largua nga salla, duke përshëndetur deputetët e opozitës me puthje.
Në nisje të seancës, deputeti demokrat Belind Këlliçi ndezi një flakadan në sallë. Deputetët e opozitës hodhën ujë dhe kartonë votimi në drejtim të kryetarit të Kuvendit, Niko Peleshi. Mes deputetëve që zunë karriget e ministrave ishin Klevis Balliu, Flamur Noka, Elda Hoti dhe Belind Këlliçi. Elda Hoti hodhi ujë në drejtim të gardistëve, ndërsa këta të fundit rrethuan deputetët për t’i larguar nga vendet e zaptuara.
Situata vijoi me përjashtime nga seanca. Klevis Balliu u përjashtua, ndërsa Niko Peleshi dha pushim të përkohshëm për t’i kërkuar atij të largohej nga salla. Më pas u përjashtua edhe Flamur Noka, pasi i hodhi ujë një gardisti. Pavarësisht përjashtimeve, deputetët opozitarë vijuan revoltën, duke rrëzuar edhe karrigen e zv.kryeministres Belinda Balluku.
Mazhoranca kaloi direkt në votim, ndërkohë që Garda vijonte përpjekjet për të liruar karriget e ministrave, por deputetët demokratë refuzuan të largoheshin dhe vazhduan të hedhin sende në drejtim të Niko Peleshit.
Ndërkohë, kryetari i Partisë Demokratike, Sali Berisha, u shfaq live në Facebook nga Kuvendi, duke komentuar situatën dhe duke u dhënë udhëzime deputetëve që të qëndronin te karriget e ministrave. Ai paralajmëroi gjithashtu gardistët për “pasoja të rënda” nëse do të preknin deputetët.
Teksa brenda Kuvendit situata ishte jashtë kontrollit, jashtë godinës fibrat e transmetimit të televizioneve u përfshinë nga flakët, duke shkaktuar ndërprerje të transmetimeve live. Ende nuk dihet shkaku i zjarrit.
