Deputetja e PD, Jorida Tabaku, ka përsëritur thirrjen e saj për reflektim brenda radhëve të demokratëve pas zgjedhjeve të pjesshme vendore, megjithëse në praktikë nuk vihet re asnjë lëvizje konkrete në forcën politike ku ajo bën pjesë.
Në një intervistë për A2 CNN, Tabaku u shpreh se pjesëmarrja e ulët e votuesve ishte një sinjal i qartë se qytetarët kanë humbur besimin tek politika.
“E pashë me trishtim pjesëmarrjen në zgjedhje. Ky ishte një mesazh për politikën që duhet të bëjë gjërat ndryshe. Ka ndodhur që zgjedhjet e pjesshme t’i fitojë qeverisja, por këtë herë në Vlorë është zgjedhur kryetar bashkie me vetëm 6% të votave. Nuk mund të quhet proces. Njerëzit nuk kanë besim. Nuk them se fajin e ka vetëm pala tjetër, ne duhet patjetër të shohim edhe te vetja,” deklaroi Tabaku.
Megjithatë, thirrjet e deputetes demokrate duken se mbeten vetëm për tituj mediash, pasi brenda PD-së ky problem nuk trajtohet me seriozitet. Ndoshta, përpara se t’i artikulojë në studio televizive, më e frytshme do të ishte që Tabaku t’i ngrinte këto shqetësime drejtpërdrejt me drejtuesit e partisë. Dhe në zgjedhjet e radhës mos të fshihen pas kandidatëve të pa(njohur)varur, duke i lënë fillkat për të bërë fushatë.
