Deputetja demokrate Jorida Tabaku ka shpërndarë një tekst të gatshëm për median me një copëz të fjalimit që ka mbajtur në një konferencë të zhvilluar me rastin e 30-vjetorit të anëtarësimit të Shqipërisë në Këshillin e Europës. Sipas tekstit të shpërndarë nga zyra e saj e shtypit, mësohet se zonja Tabaku këtë herë ka marrë përsipër të flasë si eksperte e ligjit – duke u ndalur tek efektet negative të reformës në drejtësi.
Tabaku u ndal edhe te pasojat që solli mungesa për tre vite e Gjykatës Kushtetuese, duke e cilësuar këtë periudhë si “krizë të demokracisë kushtetuese”.
“Reforma në drejtësi, megjithëse u nis me qëllime të mira dhe me kontribut të rëndësishëm nga Partia Demokratike, e la vendin për tri vjet pa Gjykatë Kushtetuese. Në atë kohë Shqipëria ishte një shtet pa arbitër kushtetues. Çdo nismë që prekte balancat e pushtetit mbeti pa testin e kushtetutshmërisë. Dhe siç duket, maxhoranca u mësua pa të”, theksoi ajo.
Ndoshta ekspertiza e eksportuar e zonjës Tabaku në çështjet e drejtësisë mund ta kishte bërë më të qartë për të mbajtur një qëndrim për krizën aktuale të Gjykatës Kushtetuese, gjë për të cilën Partia Demokratike dhe kryetari i saj kanë pasur një qëndrim të qartë dhe të fortë.
