Në një kohë kur të gjitha mediat ndërkombëtare dhe vendase flasin për ishullin e Sazanit, i cili thuhet se i është dhënë çiftit Ivanka Trump dhe Jared Kushner, kreu i Partisë Demokratike, Sali Berisha, ende nuk është në dijeni. Të paktën kështu deklaroi vetë në një konferencë për shtyp ditën e sotme, ku u shpreh se nuk ka informacion që ishulli të jetë shitur.
Madje, Berisha u tregua parimisht dakord me veprimin e qeverisë, duke theksuar se legjislacioni shqiptar lejon dhënien e pronave me 1 euro për investitorët strategjikë.
"Së pari, të jem i hapur me ju, nuk kam asnjë të dhënë se kemi të bëjmë me një shitje. Ligjet shqiptare lejojnë dhënien me 1 euro, siç dihet, për një periudhë të caktuar të terreneve, trojeve dhe tokave. Unë nuk kam asnjë dijeni se ishulli i Sazanit është blerë nga çifti Kushner apo është shitur nga kreu i organizatës kriminale, Edi Rama personalisht, nuk kam asnjë lloj dijenie, sepse ligjet shqiptare nuk parashikojnë një gjë të tillë", tha Berisha.
Domethënë kreu i PD i cili përdit reagon për çdo veprim të qeverisë, nuk qenka në dijeni për ishullin e Sazanit, që përveç se e kanë marrë vesh të gjithë shqiptarët, është kthyer në kryelajm edhe në mediat e huaja. Sigurisht që Berisha dhe PD janë në dijeni të këtyre fakteve, por kanë vendosur të mos e kundështojë këtë projekt, pasi bëhet fjalë për familjen e Donald Trump.
Ndoshta edhe nga shpresa se presidenti i SHBA do të rrëzojë qeverinë e Ramës apo do të heq “non gratën” e tij, kreu i opozitës shfaqet i habitur për "shitjen" e ishullit, dhe është një nga rastet e rralla kur Sali Berisha ka zgjedhur të mos ketë dijeni.
Për ta bërë më të qartë qëndrimin e tij, mjafton të kujtojmë se opozita nuk ka kundërshtuar asnjëherë publikisht projektin e Kushner në Sazan. Dhëndri i Donald Trump, që në janar të këtij viti, ka marrë statusin e investitorit strategjik në Shqipëri. Edhe figura të tjera të opozitës, kur pyeten për këtë çështje, shprehen se “PD nuk është kundër biznesit”.
Në këtë situatë, Berisha do të dukej më i sinqertë nëse do të deklaronte hapur se është dakord me dhënien me 1 euro të ishullit të Sazanit, sesa të mundohej të fshihej pas deklaratave kontradiktore. Sepse, për një herë, të thuash troç është më pak e dëmshme sesa të bësh sikur nuk di asgjë.
