Inxhinieri Romeo Nazarko, i ftuar në emisionin “Studio 24”, ka ngritur alarmin për mënyrën se si po zbatohen projektet infrastrukturore në Shqipëri, duke deklaruar se një pjesë e madhe e tyre realizohen me licenca fiktive dhe me mungesë të theksuar kontrolli teknik në terren.
Sipas Nazarkos, shmangia e standardeve teknike dhe mungesa e inxhinierëve në terren kanë sjellë situata problematike në disa segmente rrugore në vend.
Nazarko theksoi se për të garantuar standarde cilësore nevojiten burime njerëzore të specializuara dhe investime në makineri, ndërsa shtoi se tenderat shpeshherë janë të paracaktuar.
Ai përmendi si shembuj problematikë rrugën “Korçë–Kolonjë”, ku sipas tij ka pasur rrëshqitje dhe madje shembje ure, si dhe segmentin Qukës–Qafë Plloçë. Sipas inxhinierit, në disa raste bëhet fjalë për të njëjtën kompani që po zbaton punimet.
Sipas tij, i vetmi filtër real mbeten drejtuesit teknikë që ndodhen në terren, ndërsa sistemi i mbikëqyrjes institucionale lë për të dëshiruar.
Romeo Nazarko: Si ka mundësi që hidhen miliona euro dhe ne jemi sërish në situatë kritike me rrugët?! Nuk janë milionat e eurove që e mbajnë një rrugë në këmbë por standardet teknike dhe cilësia e materialeve të punimeve.
Standardet teknike lënë për të dëshiruar, që të krijosh standard duhet të kesh burime njerëzore dhe të investosh tek ato dhe në makineri. Fakti që këtu tenderat paracaktohen , dmth që drejtuesit nuk harxhojnë para por të gjithë koston e shpenzojnë për të qënë sa më afër ministrit.
Kurse nëse përsa i takon nëse është rrëshkitje, kjo situatë ka 2 vjet që po shihet në gjithë vendin, kemi rrëshqitje në rrugën “Korçë-Kolonjë që ra një urë e tërë ,dhe për fat të keq është e njëjta kompani që po punon dhe këtu, dhe Qukës-Qafë Plloçë. Shmangia e anashkalimi i standardeve teknike si dhe mungesa e inxhinierëve në terren sepse një pjesë e projekteve bëhen nga kompani me licenca fiktive nga inxhinierë që punojnë në institucione shtetërore. Inxhinieri punon në administratë dhe licenca e tij qarkullon në studio e projektimit dhe dosjet e tenderimit dhe kush i kontrollon ata, kontrolli është zero. Vetëm drejtuesit teknik qëë janë në terren, e bëjnë këtë.
