Jorida Tabaku ka vendosur t’i dërgojë një ftesë të re për "vallëzim" politik Kryeministrit Edi Rama. Noshta ka ende nostalgji për dritat e prozhektorëve gjatë komisionit hetimor për inceneratorët, deputetja e opozitës po kërkon me ngulm një tjetër duel që ta faktorizojë në sytë e publikut.
Por Rama nuk është i vetmi që ajo kërkon t’i marrë "llogari". Në listë është Ministri i Financave, Petrit Malaj, të cilit e ka kërkuar ta marrë në pyetje për bllokimin dyvjeçar të rivlerësimit të pronave, duke u shqetësuar se mos ndërtuesit në bregdet po paguajnë shumë pak taksa.
Por, "pjata kryesore" mbetet kërkesa për interpelancë me Kryeministrin. Këtë herë, shënjestra është Korporata Shqiptare e Investimeve. Tabaku, me një ton që të kujton dramat e mëdha, shpreh shqetësimin se ky institucion po shndërrohet në një "instrument të diskutueshëm" për menaxhimin e aseteve publike.
"Në këto kushte, ekziston rreziku real që Korporata Shqiptare e Investimeve të shndërrohet në një instrument për zhvillimin dhe administrimin e pronës publike përmes marrëveshjeve me subjekte private pa transparencën dhe garancitë e nevojshme për mbrojtjen e interesit publik, duke krijuar në praktikë një formë të re të transferimit të kontrollit ekonomik mbi pasuritë publike,"-thuhet në shkresë.
Nuk është vështirë të lexosh mes rreshtave të kërkesave të saj zyrtare. Pas performancës te inceneratorët, ku ajo u përpoq të ndërtonte imazhin e "inkuizitores" moderne ndaj Ramës, Tabaku duket se e ka kuptuar që asgjë nuk e mban më gjallë në titujt e mediave sesa një ballafaqim direkt me kreun e qeverisë.
Ndërsa qytetarët presin zgjidhje konkrete, deputetja Tabaku duket se është e zënë me hartimin e pyetjeve që ngjajnë më shumë me skenat e një "remake-u" politik.
Pyetja që mbetet është: a po kërkon vërtet Tabaku transparencë për pronat dhe investimet, apo thjesht po i mungon ajo ndjesia faktorizuese e të qenit "përballë Ramës"?
