Në politikën shqiptare ka momente kur mungesa flet më shumë se çdo fjalim në foltoren e Kuvendit. Kështu duket se po ndodh edhe sot, në seancën ku pritet të diskutohet çështja e imunitetit të Belinda Ballukut.
Në sallë mungojnë dy emra të rëndësishëm të shumicës: Fatmir Xhafaj dhe ish kryetarja e Kuvendit, Elisa Spiropali. Por ndërsa mungesa e parë mund të kalojë pa shumë zhurmë, ajo e Spiropalit ngre më shumë se një pikëpyetje.
Sepse kjo nuk është hera e parë që ish kryetarja e Kuvendit duket se nuk ecën në sinkron me linjën zyrtare të grupit parlamentar socialist.
Sipas burimeve nga mbledhja e fundit e grupit të PS, kur u diskutua çështja e imunitetit të Ballukut, Spiropali nuk u rreshtua me shumicën për ta mbrojtur ministren nga hetimi. Me fjalë të tjera, ndërsa pjesa më e madhe e grupit votoi për të mos “lëshuar” imunitetin, kryetarja e Kuvendit zgjodhi të mos jetë pjesë e këtij kori.
Një detaj që në çdo parlament normal do të quhej debat politik i brendshëm. Por në politikën shqiptare, ku disiplinimi i votës shpesh është më i fortë se bindja personale, një devijim i tillë tingëllon pothuajse si herezi.
Ironia është se sot, kur çështja e imunitetit pritet të diskutohet publikisht, Spiropali nuk është fare në sallë.
Një mungesë që lë hapur një pyetje të thjeshtë:
është kjo një mënyrë elegante për të mos votuar kundër partisë, apo për të mos votuar kundër ndërgjegjes?
Sepse ndonjëherë në politikë mënyra më e sigurt për të mos tradhtuar askënd është të mos jesh fare aty kur duhet të ngresh kartonin.
Dhe në këtë rast, Elisa Spiropali duket se ka zgjedhur pikërisht këtë rrugë:të mos jetë në sallë, në mënyrë që askush të mos mund të thotë me siguri se në cilën anë do të kishte votuar.
