Këshilli i Lartë Gjyqësor reagoi pak ditë më parë lidhur me sulmet që kryeministri Edi Rama ka bërë në adresë të gjyqtarëve.
Pas një heshtje të gjatë, ajo që konsiderohet si “qeveria e gjyqësorit” bëri një reagim të thatë, në të cilin nuk guxoi as të përmendte emrin e kryeministrit, por tha se ajo që kishte shkruar merr shkas nga deklaratat e fundit të bëra “nga subjekte publike apo private”.
Dhe për “subjekte publike dhe private” në këtë rast i referohet kryeministrit dhe kryetarit të opozitës. Pa harruar edhe ministrin e drejtësisë. Të vetmit zyrtarë të lartë që deri më sot kanë sulmuar nga pozitat politike gjyqësorin.
Në dukje një reagim i vakët, në kufijtë e qesharakës. Në pamje të parë ai ngjan me një frikë që Këshilli i Lartë i Gjyqësorit ka nga politika, apo më saktë nga kryeministri. Por, siç ndodh rendom në Shqipëri, ajo që duket si një vështirësi e madhe parimore, në thelb është një ngjarje banale për interesa meskine.
VNA lexoi një shkresë zyrtare të Kuvendit të Shqipërisë, ku bashkëshortja e Ilir Rusit, kryetarit të KLGJ, Kesiana Rusi, mban pozicionin si “këshilltar jurist në Shërbimin për Monitorimin e Institucioneve që Raportojnë dhe Informojnë Kuvendin”.
Thënë ndryshe, brenda familjes së juristëve Rusi kemi bashkëshortin që “qeveris” gjyqësorin dhe bashkëshorten që monitoron institucionet e drejtësisë. Me ndryshimin e vetëm se kjo e fundit zgjidhet në detyrë me firmën e Elisa Spiropalit, ndërsa Ilir Rusi duhet të jetë dikush që nuk ka asnjë fije të lidhur me politikën.
Në pamje të parë dhe në interpretimin e parë të ligjit, asgjë nuk e pengon gruan e Rusit të zhvillohet në karrierë. Por nga ana tjetër, pikërisht ngjitja e saj në një nga institucionet kryesore të vendit, siç është Kuvendi, duket se e pengon bashkëshortin e saj të kundërshtojë akuzat e kryeministrit, siç edhe do të duhet të vepronte ky institucion.
KLGJ normalisht do të duhet të dënonte sulmet e paprecedenta që Edi Rama dhe Sali Berisha i bëjnë gjyqtarëve. Ndoshta do të ishte më mirë të heshtte se të reagonte në atë mënyrë qesharake. Në një vend të vogël si Shqipëria, sigurisht që karrierat e bashkëshortëve juristë mund të bashkohen diku. Por konflikti i interesit dhe emërimet nga politika janë padyshim një kërcënim për të menduar si njeri i lirë. Si profesionist, duket se zoti Rusi nuk ka menduar në asnjë moment për drejtimin e KLGJ.
