Ndërsa krimi bëhet gjithnjë e më prezent në rrugët e Shqipërisë, Ilir Proda duket se ka një tjetër hall – hakerët.
Në një vend ku babai vritet nga djali në Durrës dhe një picier ther kolegun për një tas proshutë në zemër të Tiranës, drejtori i Policisë së Shtetit paralajmëron qytetarët të mos bien pre e… emaileve të rreme.
Sipas komunikatës zyrtare të shpërndarë sot, disa “shtetas të paidentifikuar” kanë krijuar një adresë false elektronike, që hiqet si ajo e vetë Drejtorit të Policisë. Me anë të saj, qytetarëve u dërgohen mesazhe kërcënuese, duke u thënë se janë në hetim për krime kibernetike apo për vepra në fushën e narkotikëve, dhe se duhet të paraqiten në polici brenda 24 orëve.
Policia qetësoi publikun me një njoftim ku ndër të tjera thuhet: emailet janë të rreme, të mos shqetësohen. Dhe sqarimi vazhdon me seriozitet:
“Policia e Shtetit nuk dërgon kurrë njoftime zyrtare për hetime nëpërmjet email-it dhe asnjë strukturë nuk kërkon që qytetarët të paraqiten pa një thirrje të firmosur e të protokolluar.”
Fatmirësisht, vrasësit që dalin në rrugë nuk kanë nevojë për adresë elektronike. Ata veprojnë në heshtje, pa protokoll dhe pa paralajmërim dixhital.
Ndërkohë, Policia është e përqendruar në “hetimin e email-eve” dhe jo të vrasjeve që ndodhin çdo ditë nën dritën e diellit.
Ironia është therëse: qytetarëve u kërkohet të mos klikojnë mbi mesazhet mashtruese, por askush nuk i paralajmëron të mos ecin në rrugët ku krimi ndodh hapur.
Në Shqipërinë e Ilir Prodës, duket se kërcënimi më i madh nuk është më arma, por fantazmat digjitale që flasin në emrin e tij.
