Ilir Alimehmeti është shprehur se takimet e zhvilluara nga Ervin Salianji me strukturat e bazës kanë shërbyer si një “zgjim” për Partinë Demokratike, e cila, sipas tij, kishte rënë në një gjendje përgjumjeje pas zgjedhjeve të vitit të kaluar.
Në një intervistë për News24, Alimehmeti deklaroi se mban kontakte të vazhdueshme me kreun e PD-së, Sali Berisha, edhe pse mes tyre mund të ketë mendime të ndryshme për mënyrën se si duhet të veprojë partia.
“Çdo takim opozitar ka vlerën e vet, ka vlerë edhe çdo takim me partitë e tjera, sa kohë kemi një emërues të përbashkët që është rrëzimi i qeverisë, çdo organizim ka vlerë. Unë kam takime të vazhdueshme me kreun e PD, bashkëpunoj me të gjithë në PD dhe në opozitë. Mund të kemi mendime të ndryshme se si bëhet më e mira, e rëndësishme është të kemi një emërues të përbashkët. E vërteta është që kishte një përgjumje dhe kishte nevojë për një zgjim, çka u arrit. U arrit të shkohej në bazë”, tha ai.
Alimehmeti dhe Salianji ishin nismëtarët e takimeve me demokratët në bazë, iniciativa që krijoi jo pak shqetësime në radhët e lidershipit të Partisë Demokratike. Pas reagimeve dhe kritikave nga Berisha dhe drejtues të tjerë të PD-së, Alimehmeti nuk u shfaq më në këto takime. Ndërkohë, Salianji është shpallur “armik” brenda partisë dhe është përjashtuar nga Kryesia e PD.
