Ilir Alimehmeti duket se është ende në pritje të një kandidati tjetër përballë Sali Berishës në garën për drejtimin e Partisë Demokratike.
Në një intervistë për A2 CNN ai u shpreh se deri tani nuk njeh ndonjë kandidaturë tjetër, por nëse ekziston, atëherë ajo duhet të shfaqet publikisht.
“Kryetari patjetër që është organi më i rëndësishëm ndoshta i Partisë Demokratike. Partia në vetvete vendoset dhe fillon nga data 6 qershor sepse Kuvendi cakton Këshillin. Këshilli pastaj cakton Kryesinë, nënkryetarët, sekretariatet, të gjithë pjesën organizative. Unë s’e di të ketë kandidatura që deri sot të jenë shpallur, të kenë shpallur ambicie, të kenë shpallur një vizion, një platformë përveç asaj të doktor Sali Berishës. S’di të ketë tjetër. Nëqoftëse ka tjetër, do ta presim të na shfaqet”, u shpreh Alimehmeti.
Në fakt, problemi në Partinë Demokratike nuk është nëse mund të gjendet një kandidat tjetër. Në politikë kandidatë nuk mungojnë kurrë.
Problemi është se në PD prej kohësh nuk duket të ketë një garë reale për kryetarin.
Kjo është arsyeja pse ideja e “pritjes për një kandidat tjetër” tingëllon pak paradoksale. Sepse edhe nëse një kandidat i tillë shfaqet, pyetja që mbetet është nëse ai hyn në një garë të vërtetë apo thjesht në një proces formal ku rezultati duket i ditur që në fillim.
Në këtë kuptim, pritja për një kandidat tjetër ngjan më shumë si pritja për një debat që askush nuk e ka planifikuar të zhvillohet.
Sepse në PD kandidati mund të gjendet.
Ajo që është shumë më e vështirë për t’u gjetur është gara.
