Ilir Alimehmeti duket se e ka merituar rolin e drejtuesit politik të Tiranës, duke zëvendësuar Belind Këlliçin.
Mjeku dhe ish-kandidati për deputet i Partisë Demokratike ka deklaruar në një intervistë për A2 CNN se Sali Berisha nuk duhet të largohet nga drejtimi i PD-së, pavarësisht rezultatit zhgënjyes të opozitës në zgjedhjet e 11 majit.
“Berisha nuk duhet të iki. Jo, mendoj që jo në këto momente. Kjo shkon: ka mbështetje apo jo nga anëtarësia. Unë që vij nga terreni, mendoj që ai ka ende mbështetje,” tha Alimehmeti.
Ai shtoi se problemi kryesor i opozitës nuk lidhet me drejtimin e partisë, por me sistemin zgjedhor që, sipas tij, nuk lejon garë të ndershme.
“Duket sikur problemi në këtë vend është PD. Por nuk është kështu. Ka pasur dhe 9 forca të tjera politike, shumë oferta të tjera. PS nuk e duan, PD nuk e duan, por nuk të lë sistemi. Sistemi është bërë gabim. Kur është bërë, ka pasur zëra kundër,” u shpreh Alimehmeti.
Duke analizuar rezultatin, ai theksoi se disa qarqe kanë dalë më keq se të tjerat, por kjo, sipas tij, lidhet me mënyrën se si është ndërtuar vetë sistemi elektoral dhe jo me mungesë mbështetjeje në terren.
