Prej dy ditësh, Inspektorati Kombëtar i Mbrojtjes së Territorit (IKMT), i mbështetur nga Policia e Shtetit, ka ndërmarrë një aksion në Parkun Kombëtar të Valbonës, në Tropojë, për të shembur struktura të ndërtuara pa leje në një nga zonat më të mbrojtura të vendit.
Pas prishjes së 8 ndërtimeve me betonarme ditën e djeshme në fshatin Rragam, sot IKMT ka vijuar me identifikimin dhe planifikimin për shembjen e 12 objekteve të tjera, mes tyre struktura betoni dhe ngrehina të tjera të ndërtuara në kundërshtim me ligjin.
Sipas njoftimit zyrtar, IKMT thekson se operacioni do të vijojë pa ndërprerje, me qëllim evidentimin dhe goditjen e çdo forme ndërtimi të paligjshëm brenda zonave të mbrojtura, duke garantuar ruajtjen e integritetit mjedisor të Parkut Kombëtar të Valbonës.
Aksioni është pjesë e një nisme të re për të luftuar paligjshmërinë në ndërtim dhe për të rikthyer kontrollin mbi hapësirat natyrore, të cilat vitet e fundit janë përballur me ndërhyrje të shumta të jashtëligjshme.
Autoritetet janë shprehur të vendosura në vijimin e operacionit, duke theksuar se askush nuk do të tolerohet në shkeljen e ligjit dhe shkatërrimin e pasurive natyrore të vendit.
