Drejtoria e Përgjithshme e Burgjeve ka kërkuar masë disiplinore ndaj avokatit të Ilir Metës, Kujtim Cakranit, për shkak të lejes që i ka dhënë ish-presidentit të komunikojë me median përmes telefonit të tij.
Sipas Drejtorisë, Cakrani ka shkelur rregullat duke lejuar Metën të japë një audio-intervistë nga ambientet e paraburgimit, ku qëndron prej tetorit të vitit të kaluar, i akuzuar për korrupsion, pastrim parash dhe fshehje pasurie.
Ligji “Për të Drejtat dhe Trajtimin e të Dënuarve dhe të Paraburgosurve” kërkon që çdo formë komunikimi e të paraburgosurve, përfshirë telefonatat dhe takimet, të miratohet më parë nga prokurori i çështjes. Sipas Drejtorisë, ky rregull është shkelur më 1 korrik 2025, kur Cakrani, i ftuar në një emision televiziv, mundësoi intervistën përmes telefonit të tij.
Drejtoria e Burgjeve thekson se nuk ka dhënë asnjë autorizim për këtë komunikim, duke e cilësuar veprimin si një ndërhyrje të papranueshme që dëmton rendin dhe autoritetin e institucionit të paraburgimit. Ajo paralajmëron se ky rast krijon një precedent të rrezikshëm dhe shkel dispozitat ligjore dhe standardet etike të avokatit.
