Ferit Hoxha e ka mundur dy herë Elisa Spiropalin. Jo thjesht ditën që i zuri karrigen, duke u bërë ministër i jashtëm, por edhe në daljet e tij publike, ku nuk njeh metër dhe as peshore në lavdet ndaj Edi Ramës.
Ndryshe nga Elisa që fliste me qetësi dhe ashpërsi, Feriti ka edhe një nxitim të jashtëzakonshëm për të bombarduar mikrofonin me konsiderata të larta për kreun e qeverisë.
Teksa u paraqit në Komisionin për Politikën e Jashtme, Ministri Hoxha justifikoi një artikull të përbashkët, një editorial i Edi Ramës dhe Aleksandër Vuçiç.
“Kush e mendonte para 3 vitesh se Shqipëria do të ishte në SEPA? Askush. E kemi sot, i bëjmë transfertat.
Pse u bë me Vucic?
Ishte një artikull, nuk është aleancë apo projekt kundër ndokujt në rajon. Nëse ndihmon në integrimin e përshpejtuar. Dëshmi që vendet e rajonit mund ta gjejnë gjuhën pavarësisht ndasive. Tregon pjekuri politike dhe përgjegjësi edhe me ata që nuk jemi dakord.
Askush nuk u thellua fare pak, për të kuptuar diçka më shumë.
Ai artikull me atë qasje, nëse aplikohej, e bënte Kosovën vite përpara, se sa është sot në raport me BE-në”,-tha ndër te tjera ministri gjatë paraqitjes në Komisionin për Politikën e Jashtme.
