Ambasadori i Bashkimit Evropian në Shqipëri, Silvio Gonzato, iu është përgjigjur deklaratës së papërshtatshme të ish-kryeministrit Sali Berisha për orientimin e tij seksual. Në një intervistë në emisionin “Top Story”, Gonzato e cilësoi këtë deklaratë si “të pakëndshme”.
“Në nivel personal, deklaratat që janë bërë në atë rast, por edhe në raste të tjera që lidhen me jetën time private, do t’i përkufizoja si të pakëndshme. Nuk më prekin shumë — jam njeri i rritur, i vetëdijshëm për zgjedhjet e mia dhe u qëndroj besnik. Ajo që më shqetësoi ishte nënkuptimi se këto zgjedhje personale mund të turbullonin gjykimin tim profesional, se po bëja gjëra si ambasador i BE-së për shkak të historisë sime personale. Kjo është diçka që nuk mund ta pranoj,” – u shpreh Gonzato.
Ai shtoi se ndjehet i mbështetur nga eprorja e tij, Komisionerja Kos, e cila reagoi menjëherë duke shprehur besim të plotë në profesionalizmin e tij.
Gonzato foli gjerësisht për reformën në drejtësi dhe rëndësinë e saj në procesin e integrimit të Shqipërisë në Bashkimin Evropian, duke vlerësuar arritjet e deritanishme
“Reforma në drejtësi është çelësi i përparimit të Shqipërisë drejt BE-së. Në raportin e progresit janë vlerësuar arritjet e SPAK-ut në luftën kundër korrupsionit dhe krimit të organizuar, por kërkohet më shumë. Duhet të intensifikohen hetimet financiare, të rritet sekuestrimi i aseteve dhe bashkëpunimi me agjencitë e zbatimit të ligjit në vendet anëtare,” – theksoi ambasadori.
Në përfundim, ambasadori i BE-së në Tiranë nënvizoi se institucionet shqiptare “janë më të qëndrueshme dhe më të afta për t’u përballur me presionet politike” se kurrë më parë.
