Në seancën e sotme në Gjykatën Kushtetuese, përfaqësuesit e Presidentit të Republikës paraqitën kërkesën që gjykata të shpallë moskompetencën për të shqyrtuar dekretin presidencial që caktoi datën e zgjedhjeve në Tiranë. Sipas tyre, ky dekret është një akt administrativ dhe nuk mund të jetë objekt kontrolli kushtetues.
“Kemi kërkuar që të rimerret në shqyrtim çështja e kompetencës për shfuqizimin e dekretit nr. 350, datë 01.10.2025 dhe të deklaroni në fillim të seancës moskompetencën, sepse nuk mund të shqyrtoni një akt administrativ siç është ky dekret. Zgjedhjet në Tiranë u penguan, duhet të rikthehet kushtetutshmëria dhe të shpallet moskompetenca për shqyrtimin e dekretit”, thanë përfaqësuesit e Presidencës.
Por pas shqyrtimit të kërkesës, Gjykata Kushtetuese vendosi se ka kompetencë për të trajtuar edhe dekretin e Presidentit, duke argumentuar se ai përbën një hallkë vijuese të vendimit të Këshillit të Ministrave për shkarkimin e Erion Veliajt dhe, për këtë arsye, hyn në juridiksionin e saj.
Ky vendim vjen pasi më herët, në dhomë këshillimi dhe pa praninë e palëve, GJK kishte pezulluar zbatimin e dekretit dhe konfirmuar paraprakisht kompetencën, vendim që sot u rikonfirmua pas dëgjimit të argumenteve të Presidencës.
Me rrëzimin e kërkesës për moskompetencë, gjykimi vijon me shqyrtimin në themel të pretendimeve të palëve në çështjen për shkarkimin e Veliajt dhe datën e zgjedhjeve në Tiranë.
Seanca është në zhvillim.
