Gjykata Kushtetuese pritet të shpallë zyrtarisht vendimin për kërkesën e paraqitur nga Sali Berisha lidhur me tre qëndrimet e gjykatave më të ulëta mbi masën e arrestit shtëpiak. Mësohet se Kushtetuesja i ka dhënë të drejtë Berishës me arsyetimin se kohëzgjatja e mbajtjes së tij nën arrest shtëpiak ka qenë e tejzgjatur.
Për ta shpjeguar thjesht, pasi masa e “detyrimit për paraqitje” iu zëvendësua me “arrest në shtëpi”, SPAK kishte detyrimin që çdo dy muaj të paraqiste në gjykatë një relacion mbi ekzistencën e kushteve të masës së sigurimit. Në praktikë, SPAK e ka vonuar dërgimin e këtij relacioni me të paktën pesë muaj.
Së dyti, sipas praktikës së Gjykatës Europiane për të Drejtat e Njeriut në Strasburg për raste të ngjashme – konkretisht kur një masë më e lehtë zëvendësohet me arrest në shtëpi për shkak të mosrespektimit të saj – parashikohet se kohëzgjatja e arrestit në shtëpi nuk mund të jetë kaq e gjatë. Në këto raste, Strasburgu vlerëson se kohëzgjatja mesatare e arrestit shtëpiak duhet të jetë rreth dy deri në tre muaj.
Në këtë kuadër, Gjykata Kushtetuese vlerëson se mbajtja e Berishës në arrest shtëpiak përtej këtyre afateve ka qenë e pajustifikuar, duke rrëzuar qëndrimet e gjykatave më të ulëta mbi këtë masë sigurie.
