Gjykata Kushtetuese e Shqipërisë ka shpallur vendimin për çështjen e shumëdebatuar të pagave të gjyqtarëve dhe prokurorëve, duke pranuar pjesërisht kërkesën e Unionit të Gjyqtarëve dhe duke shfuqizuar disa dispozita të ligjit nr. 33/2023, të cilat i cilësoi të papajtueshme me Kushtetutën.
Sipas vendimit, Gjykata vlerësoi se paga dhe përfitimet e gjyqtarëve janë të mbrojtura në nivel kushtetues dhe nuk mund të pësojnë ulje apo ndërhyrje që cenojnë pavarësinë e pushtetit gjyqësor. Në arsyetim theksohet se pagesa duhet të jetë në përpjesëtim me dinjitetin dhe rëndësinë e funksionit, ndërsa çdo formulë ligjore duhet të jetë objektive, e parashikueshme dhe transparente, në mënyrë që të shmangë ndërhyrjet arbitrare nga pushtetet e tjera.
Gjykata konstatoi se ndryshimet e bëra me ligjin e vitit 2023, edhe pse nuk sollën ulje nominale të pagës së magistratëve, kanë prodhuar një “ulje të fshehur” të vlerës reale të saj, për shkak të ndryshimit të formulës së referencës dhe ndikimit të inflacionit dhe zhvillimeve ekonomike të viteve të fundit. Për këtë arsye, u vendos shfuqizimi i fjalisë së parë të shkronjës “a” të nenit 1 dhe pikës 2 të nenit 2 të këtij ligji.
Çfarë vendosi konkretisht Gjykata Kushtetuese
Në përfundim të shqyrtimit, Gjykata me shumicë votash vendosi:
• Pranimin pjesërisht të kërkesës;
• Shfuqizimin e dispozitave të caktuara të ligjit nr. 33/2023, si të papajtueshme me Kushtetutën;
• Detyrimin e Kuvendi i Shqipërisë të miratojë ndryshimet e nevojshme ligjore brenda datës 31 korrik 2026;
• Efektet e shfuqizimit të hyjnë në fuqi me hyrjen në fuqi të ligjit të ri dhe, në çdo rast, jo më vonë se 31 korrik 2026;
• Vendimi është përfundimtar dhe hyn në fuqi ditën e botimit në Fletoren Zyrtare.
Gjykata ka kërkuar gjithashtu që ligjvënësi të parashikojë një skemë të arsyeshme për pagesat e prapambetura për periudhën nga 1 prilli 2023 deri në hyrjen në fuqi të ligjit të ri.
