Pas vendimit të Gjykatës Kushtetuese që pezulloi dekretin e Presidentit për zhvillimin e zgjedhjeve në Bashkinë e Tiranës, ka ardhur reagimi i parë nga radhët e qeverisë. Ministri i Shtetit për Parlamentin, Toni Gogu, në një intervistë për Top Channel, theksoi se Partia Socialiste mbetet e përkushtuar ndaj respektimit të ligjit dhe vijimit të punës me qytetarët.
“Ai ishte një vendim që e marrin organet që bëjnë zgjedhjet. PS është garuese në zgjedhje dhe nuk organizon zgjedhje. Presidenti cakton datën dhe Gjykata e shqyrton më pas. Si përfaqësues i PS, gjëja e parë është që respektojmë ligjin, gjë që e kemi bërë që ditën e parë; nuk komentojmë vendimet e gjykatave, e sidomos asaj të Gjykatës Kushtetuese,” deklaroi Gogu.
Ministri sqaroi dhe mesazhin e shpërndarë për strukturat e PS duke theksuar se socialistët do të vijojë komunikimin me qytetarët e kryeqytetit.
“Kjo gjë do të ketë një vendim themeli që Gjykata Kushtetuese do ta shqyrtojë më vonë. Shtabin e PS nuk ndryshon asgjë. Jemi në komunikim të vazhdueshëm me qytetarët e Tiranës. Patjetër që do të ketë një ditë zgjedhjesh, por kjo nuk e pengon PS që ka nisur një diskutim intensiv me qytetarët e Tiranës – si do të vazhdojmë të ofrojmë shërbime publike, hapësira publike dhe modernizimin e jetës së qytetarëve,” shtoi ai.
