Gjykata e Posaçme nuk pranoi kërkesën e avokatëve të ish-ministrit të Mbrojtjes Fatmir Mediu për të kryer akt-ekspertim të një faksi me shënimin “për Shkëlzenin”, që është paraqitur si provë në proces nga ana e SPAK.
Faksi më këtë shënim u dërgua nga Ministria e Drejtësisë tek ajo e Mbrojtjes dhe u gjet gjatë hetimeve për tragjedinë e Gërdecit, për të cilën po gjykohet ish-ministri Mediu. Lidhur me këtë çështje ka dëshmuar dhe Shkëlzen Berisha, djali i ish-kryeministrit Sali Berisha, në adresë të të cilit u nis faksi.
Ndërkohë, gjatë seancës në Gjykatën e Posaçme, avokatët e Mediut pretenduan që një sërë aktesh, që janë sjellë nga prokurorët në gjyq, por nuk ju janë vënë në dispozicion nga gjykata.
Për ta bërë të mundur këtë, gjykata ndërpreu seancën dhe e shtyu atë më datë 10 shkurt.
