Gjykata e Lartë do të shqyrtojë më 9 tetor 2025 në dhomë këshillimi rekursin e paraqitur nga ish-Presidenti i Republikës, Ilir Meta, i cili kërkon heqjen e masës së sigurisë “arrest me burg” të vendosur ndaj tij nga GJKKO dhe më pas e lënë në fuqi nga Apeli i Posaçëm.
Meta ndodhet në burg që prej 21 tetorit 2024, kur u ekzekutua masa e sigurisë ndaj tij pas hetimeve të zhvilluara nga SPAK për një sërë veprash penale, përfshirë korrupsion pasiv, pastrim parash dhe fshehje apo deklarim të rremë të pasurisë.
Hetimet janë përqendruar kryesisht në dy dosje të bujshme: aferën “CEZ-DIA”, ku Meta dyshohet se ka favorizuar kompaninë “DIA” përmes ndikimit të paligjshëm, dhe çështjen e lobimit në SHBA, ku ai dhe bashkëshortja e tij, Monika Kryemadhi, akuzohen për përdorim fondesh të padeklaruara dhe pastrim parash.
Pala mbrojtëse ka argumentuar se nuk ekzistojnë më kushtet ligjore për të mbajtur Metën në qeli, pasi hetimet janë mbyllur dhe rreziku për prishje provash apo ndikim mbi dëshmitarët nuk ekziston më. Ata kërkojnë një masë më të lehtë sigurie, si arrest shtëpie apo detyrim paraqitjeje.
Nga ana tjetër, SPAK i ka qëndruar pretendimeve të tij, duke theksuar se masa aktuale është e domosdoshme për mbarëvajtjen e procesit dhe për të garantuar që ish-presidenti nuk do të pengojë zbardhjen e plotë të çështjes.
Vendimi i Gjykatës së Lartë pritet me interes të madh, pasi mund të ketë pasoja politike të drejtpërdrejta, sidomos në një kohë kur opozita është në prag të organizimit të protestave dhe zgjedhjeve të pjesshme lokale.
