Deputeti i Partisë Demokratike, Gjin Gjoni, ka zbuluar për herë të parë në emisionin “Off the Record” me gazetarin Andrea Danglli në A2 CNN, propozimet e tij për një strategji të fortë rezistence ndaj qeverisë Rama — ide që kanë ndezur debat në shumë media.
Gjoni tha se përballë arrogancës së qeverisë, ai kishte propozuar një seri veprimesh ekstreme:
• ngujimin dhe grevën e urisë së deputetëve demokratë,
• ndryshimin e formës së protestave, për t’i bërë ato të qëndrueshme dhe jo vetëm me fjalime,
• si dhe një kontribut financiar personal nga çdo deputet, që protestuesit të mbahen me ushqime dhe ujë gjatë rrethimit të Kryeministrisë.
“Deputetët duhet të sakrifikojnë vetë, të paguajnë nga 1000 deri në 1500 euro nga rroga e tyre, që protestuesit të qëndrojnë në shesh. Jo për t’i sjellë me pagesë, por për t’i mbajtur. Vetëm kështu mund të ketë një lëvizje reale”, – deklaroi Gjoni.
Ai shtoi se protestat me fjalime dhe shëtitje në bulevard nuk kanë sjellë asnjë rezultat, ndërsa kjo formë e re e përballjes do të kishte si qëllim dorëzimin e Edi Ramës.
