Kreu i Grupit Parlamentar të Partisë Demokratike, Gazment Bardhi, ka reaguar lidhur me ndryshimet e propozuara nga Partia Socialiste në Kodin e Procedurës Penale, duke akuzuar kryeministrin Edi Rama se synon të vendosë një “mburojë” për veten përballë Struktura e Posaçme kundër Korrupsionit dhe Krimit të Organizuar (SPAK).
Në një postim në rrjetet sociale, Bardhi shprehet me ironi se “për herë të parë” e beson kryeministrin kur thotë se ndryshimet nuk kanë lidhje me zëvendëskryeministren e pezulluar dhe të marrë të pandehur nga SPAK, Belinda Balluku, por sipas tij, ato lidhen drejtpërdrejt me interesin personal të Ramës.
Sipas Bardhit, ndryshimet e propozuara synojnë që kryeministri të mos pezullohet nga detyra edhe në rast se drejtësia vlerëson se ai mund të ndikojë apo të prishë prova gjatë një hetimi. Deputeti demokrat përmend si shembuj çështjen Charles McGonigal dhe hetimet për inceneratorët, të cilat, sipas tij, janë ende në proces.
“Qëllimi i tij është personal. Ai do që funksioni i Kryeministrit të mos ndahet nga emri i Edi Ramës, pavarësisht provave të drejtësisë kundër tij”, citohet të ketë deklaruar Bardhi.
Ai shton se ndryshimet në legjislacion, të propozuara në mes të një hetimi penal aktiv për zëvendëskryeministren, krijojnë precedent dhe synojnë të parapërgatisin terrenin për raste të mundshme të ardhshme.
